Salam hörmətli RootLab.AZ oxucuları.
Bu gün sizinlə elə bir proqramdan danışacağıq ki, bir dəfə istifadə etdikdən sonra “Kaş bunu əvvəldən biləydim” deyəcəksiniz.
Əgər İT sahəsində işləyirsinizsə, xüsusilə Helpdesk, Sistem Administratoru, NOC və komandasında çalışırsınızsa, yəqin ki, masanızın üzərində bir yox, iki və ya üç kompüter olur. Birində istifadəçilərin problemlərini həll edirsiniz, digərində serverləri izləyirsiniz, başqa birində isə testlər aparırsınız. Gün ərzində isə davamlı olaraq bu kompüterlər arasında keçid edirsiniz. İndi təsəvvür edin ki, bir kompüterdə hazırladığınız PowerShell skriptini və ya 3-4 GB həcmində ISO faylını digər kompüterə köçürmək lazımdır.Adətən nə edirik? Əvvəl USB flaşkartı götürürük.Faylı USB-yə kopyalayırıq.Sonra USB-ni çıxarıb digər kompüterə taxırıq.Yenidən faylı kopyalayırıq.Əgər USB yaddaş yanımızda deyilsə, başlayırıq faylı Telegram, OneDrive, Google Drive və ya mail vasitəsilə göndərməyə. Böyük həcmli fayllarda isə bu proses bəzən 10-20 dəqiqə, hətta daha çox vaxt aparır. Üstəlik, bəzi şirkətlər təhlükəsizlik qaydalarına görə bulud xidmətlərindən istifadə etməyə icazə vermir. Bir də təsəvvür edin ki, masanızda iki klaviatura və iki siçan var. Hər dəfə digər kompüterdə işləmək lazım gələndə əlinizi başqa siçana aparırsınız. Gün ərzində bunu onlarla dəfə etdikdə həm vaxt itirirsiniz, həm də iş rahat olmur.Məhz belə hallarda Microsoft Garage Mouse Without Borders köməyinizə gəlir. Bu proqram Microsoft tərəfindən hazırlanmış tamamilə pulsuz bir vasitədir. O, eyni lokal şəbəkədə olan Windows kompüterlərini bir-biri ilə əlaqələndirir və sizə imkan verir ki, yalnız bir klaviatura və bir mouse vasitəsilə dörd fərqli kompüteri idarə edəsiniz. Ən maraqlı hissəsi isə budur ki, mouse ekranın sağ və ya sol kənarına apardığınız anda kursor avtomatik olaraq digər kompüterə keçir. Heç bir düymə sıxmağa ehtiyac olmur. Sanki bütün kompüterlər bir böyük monitorun hissələridir. Tutaq ki, əsas kompüterinizdə işləyirsiniz. Birdən server kompüterində bir şeyi yoxlamaq lazım gəldi. Sadəcə siçanı ekranın sağ tərəfinə aparırsınız və artıq digər kompüteri idarə etməyə başlayırsınız. Klaviatura da avtomatik həmin kompüterdə işləyir.Bununla da iş bitmir.
Bir kompüterdə Ctrl + C etdiyiniz mətni digər kompüterdə Ctrl + V ilə yapışdıra bilərsiniz. Şəkilləri rahatlıqla paylaşa bilərsiniz. Kiçik və orta ölçülü faylları birbaşa sürükləyib digər kompüterə ata bilərsiniz. Ən əsası isə bunların hamısını eyni lokal şəbəkə üzərindən edirsiniz. Nə USB yaddaşa ehtiyac qalır, nə də faylı internetə yükləməyə. Əgər hər gün bir neçə kompüterlə işləyirsinizsə, bu proqram sizə hər gün onlarla dəqiqə vaxt qazandıra bilər. İndi isə gəlin proqramı birlikdə quraşdıraq.
Proqramı işə saldıqdan sonra ekranda bu proqramın daha əvvəl başqa kompüterdə quraşdırılıb-quraşdırılmadığını soruşan bir pəncərə açılacaq.Əgər bu proqram artıq eyni şəbəkədə olan başqa bir kompüterdə quraşdırılıbsa, Yes (Bəli) düyməsini seçin. Əgər bu proqramı ilk dəfə quraşdırdığınız kompüterdirsə, No (Xeyr) düyməsini seçin.No (Xeyr) düyməsini seçdikdən sonra yeni bir pəncərə açılacaq. Bu pəncərədə aşağıdakı məlumatlar göstərilir:
Computer’s Security Code – Kompüterin təhlükəsizlik kodu
Computer’s Name – Kompüterin adı
Gələcəkdə şəbəkəni yenidən qurmalı olsanız, bu məlumatlara ehtiyac yaranacağından təhlükəsizlik kodunu və kompüterin adını mütləq təhlükəsiz bir yerdə (məsələn, Word və ya Notepad sənədində) saxlayın.Aşağıdakı şəkil No (Xeyr) düyməsi seçildikdən sonra açılan pəncərəni göstərir.
Qeyd: Hər bir kompüter üçün yaradılan təhlükəsizlik kodu (Security Code) fərqlidir. Buna görə də sizdə görünən kod nümunədə göstərilən kodla eyni olmayacaq.
Sonda, Finish düyməsini klikləyərək Mouse without Borders proqramının quraşdırılmasını tamamlayın və quraşdırma sehrbazını bağlayın.
Kompüterləriniz arasında Mouse without Borders vasitəsilə əlaqə yaratmaq üçün aşağıdakı addımları yerinə yetirin
1: Əsas kompüterdə Mouse without Borders proqramını açın və ikinci kompüter hələ konfiqurasiya edilmədiyi üçün NO düyməsini klikləyin.
2: Ekranda göstərilən SECURITY CODE və COMPUTER NAME məlumatlarını qeyd edin. Kompüterləri bir-birinə qoşmaq üçün bu məlumatlara ehtiyacınız olacaq.
3: İkinci kompüterə keçin, Mouse without Borders proqramını açın və Yes seçimini edin.
4: Əvvəl qeyd etdiyiniz SECURITY CODE və COMPUTER NAME məlumatlarını müvafiq sahələrə daxil edin və LINK düyməsini klikləyin.
5: Cihazlar uğurla əlaqələndirildikdən sonra konfiqurasiyanı tamamlamaq üçün NEXT düyməsini klikləyin.
Mouse without Borders proqramının konfiqurasiyasına başlamaq
SECURITY CODE və COMPUTER NAME məlumatlarını diqqətlə daxil edin (unutmayın ki, böyük və kiçik hərflərə həssasdır) və cihazlar arasında əlaqəni yaratmaq üçün LINK düyməsini klikləyin.
Qeyd: SECURITY CODE və COMPUTER NAME məlumatlarını düzgün daxil etdiyinizə əmin olun. Hər iki sahə böyük və kiçik hərflərə həssasdır (case-sensitive).
Cihazlar Mouse without Borders vasitəsilə uğurla əlaqələndirildikdən sonra davam etmək üçün NEXT düyməsini klikləyin.
Quraşdırmanı yoxlamaq üçün siçan kursorunu istənilən kompüterin ekranının kənarından kənara doğru hərəkət etdirin. Bu, Mouse without Borders proqramının xüsusi funksiyasıdır və ikinci kompüteri birinci kompüterin virtual uzantısına çevirir. Mouse without Borders sayəsində ikili sisteminiz artıq demək olar ki, tək bir kompüter kimi işləyir. Siçan və klaviaturanız hər iki sistemi problemsiz şəkildə idarə edə bilir.
